1 Timothy 2
Sidasida Yaubada 'enaya
1'Enega 'igu loina gete 'imi deliegogonao 'ediya, nugana wada sidasida Yaubada 'enaya tomota maibo'adi manudi, ta manudi wa'awanoi be wasidasida ma imi lokagutoki Yaubada 'ena. 2Ta kiniyao be toloinao manudi wate wasidasida, be 'aene 'idi loina palupaluna 'enega tada miya bobo'ana, ma ida bubuna bobo'ana, ta ma ida 'amayaba.3'Ada To'etoseyana Yaubada nina nuwanuwana be gete nadigega tada sidasida'esa, 4manuna Yaubada nina nuwanuwana tomota maibo'adi 'idi to'umalinao 'ediyega 'i'etoseyedi, be nuwadi 'ida sabwalena e'ita 'ai'aila manuna.
5Yaubada 'ebweuna namo tuga, ta wate 'ebweuna namo tai 'i'au'eweda Yaubada 'enaya, tauna Yesu Keliso. 6Manuna Keliso taunamo 'itagwalena ga 'ietaliya maibo'ada manuda, ga ale gete, tuta 'ana lobwene 'ai'aila 'enaya, Yaubada 'i'ebwa'eda.
7'Enega 'igu paisewa 'i'ebwa'egu be tetela gete yasimasimana be yaloguguya be yae'ie'ita taudi nigeya me Yudia 'ediya, be 'aene mwalatoi 'ai'aila Yaubada 'enega sida emise. Gete ona 'ai'aila, ta nigeya kabo.
8'Enega nuwanuwagu be 'oloto sena maibo'adi 'ediya, ma idi bubuna palupaluna, nimadi sigilagasidi be sisisida Yaubada 'ena, ta geya'abo ma idi gamwasowala, be ma idi egewagewana.
9Iine wate nuwanuwagu be taudimo sieiyalidi guinuwa bobo'adi 'ediyega, manuna nate totapwalolo 'ilobwenedi, ta geya'abo oodi 'ana iyala e'oe'oi 'ena 'idi tuta simudamudali, ta sida iyala'ai'aila, ta geya'abo ma idi gagasa. 11Ta wate tapwalolo solanaya ma idi 'atetagwala e'ita sida nonodi, ta geya'abo sionaona. 12Nigeya yatagwatagwala be iine sie'ita tapwalolo 'ena. Geya'abo siloiloina 'oloto 'ediya, ta esi sida miya emwa'ule, be sida enonomo. 13Manuna Yaubada Adama 'igimibubuna, ta Ibe muliyega. 14Ta wate Seitani 'ina kabo 'enaya Adama nigeya 'ineeneta, ta waine esi 'ineneta ga loegesi 'igimi guinuwena. 15Ta gete tuga iine 'idi enatuna 'enaya, Yaubada sawesawenaya 'i'etoseyedi, 'abo ma idi emisa, be ma idi oboboma, be ma idi bubuna 'esasena ta palupaluna.
Copyright information for
DOB